ULS SINDIA - Ufìtziu Limba Sarda de su Comune de Sindìa (NU)

SINDIA- SA LIMBA INTRAT IN S’ISCOLA

ARTICULU LEADU DAE SA RIVISTA DIGITALE “DIARIULIMBA”-

http://www.sotziulimbasarda.net/ghennargiu2009/sindia.htm

 

SINDIA: SA LIMBA SARDA INTRO A S’ISCOLA.

 

A primu de sas vacàntzias pro sa festas de sa Pasca de Nadale e s’Annu Nou, sos iscolanos de sas iscolas elementare e media de Sindia de s’Istitutu Cumprensivu “Gonariu II  de Turres”, ant mustradu a sa popolatzione sas cumpetentzias artisticas issoro cun cantos, ballos e cummedias teatrales.

Sa manifestatzione est istada sighida e agradessida dae meda zente, cun soddisfatzione manna de sa Dirigente Maria Antonietta Piu e de sos insegnantes chi ant traballadu cun passione e professionalidade manna.

Pro cantu pertoccat sa limba sarda, sunt istadas agradessidas meda sas tres cummedias rappresentadas dae sos iscolanos de sa classe 5A chi ant retzitadu “Su Donu de Nadale”, una “novella” de s’iscrittora nugoresa Gratzia Deledda, bortada in sardu (in sa variante sindiesa) dae sa mastra Immacolata Delrio (paris cun sos iscolanos). Sa mastra Delrio at sighidu puru sos iscolanos de sa classe 4A sos cales ant presentadu sa cummedia “Su Nadale de Tiu Giuanne” . Sa classe 3 A, sighida dae sa mastra Maria Santa Mura at presentadu sa commedia “Sos preparativos de Nadale de sa pobera zente tra passadu e presente”.

 

In s’urtimu annu, s’Istitutu Cumprensivu “Gonariu II de Turres”, at fattu una attividade manna, pro daer logu e visibilidade a sa limba sarda a intro de s’Iscola: dae sos cursos de limba sarda e sos laboratorios abertos a sa popolatzione, gratzias a su Referente su Prof. Giuanne Papi su cale, at curadu finas su calendariu nou pro s’annu 2009 de sas iscolas medias, intro a su cale pro cada mese in mesu a sas fotos de s’antigoria s’agatat una terzina iscritta dae su poete sindiesu Gigi Piu.

A innanti de tucare sa manifestatzione, sos iscolanos ant lezidu in d’unu interventu, sa voluntade e s’importantzia de torrare a” esser meres” de sa limba de sos iaios.

S’Istitutu Cumprensivu de Sindia, est unu de sos meda de sa Provintzia de Nugoro destinadu a morrer in su benidore; sa causa de custa acabbadura est su fattu chi sas ateras iscolas de sas biddas de sa Pranargia ant a passare in sa Provintzia de Aristanis. No cherimus intrare intro a chistiones politicas chi no nos pertoccant, ma solu narrer chi est una lastima s’accorpamentu de un’Istitutu Cumprensivu chi s’est fattu onore ammanizende non solu sos cursos e sos laboratorios de limba e cultura sarda, ma finas ammanizende sos cursos de inglesu, chi sunt istados sighidos cun mannu agrassedimentu dae sa populatzione sindiesa.

 

MARIO ANTIOGU SANNA – Resp. ULS de su Comune de Sindia -NU

SINDIA- SA LIMBA INTRAT IN S’ISCOLAultima modifica: 2009-01-19T17:17:08+00:00da
Reposta per primo quest’articolo