Pro unu bilantziu de s’atividade de s’ULS in s’annu 2010.

Pro unu bilantziu de s’atividade de s’ULS in s’annu 2010.

 

A pustis de sa fine de s’annu 2010, cun 11 meses de atividade de s’annualidade 2006 (finantziada dae sa Lege 482/1999), est bennida s’ora de comunicare a sos utentes chi letzent sos articulos de custu situ (o zassu o blog), sos numeros de custa atividade de comunicazione in limba sarda.

Sa novidade prus manna est istada logìstica: sa tràmuda dae sas iscolas elementares a sa sea noa de sa biblioteca in su palattu de su “Comune’Etzu”, in su tzentru istoricu.

Est istadu fatu meda, ma meda podet e podiat a essere fatu in prus, ma comente si narat “su carrigu s’acontzat in caminu”.

Su caminu pro s’impreu de sa limba sarda a intre de sas Amministratziones Comunales, Provintziales, Regionales est cumintzadu e mancari “s’andala” siat “pedrosa”, sighit a camminare, cun d’unu passu lebiu ma siguru.

Sa politica linguistica sighit a camminare, mancari sos matzones, sos tristos corvos, sos chi narant cus sas paraulas de a essere pro sa limba sarda, e peristante in sos aposentos de sos ufitzios, istant d’onni die a “traballare, pro no faghere traballare, chie cheret traballare cun e pro sa limba”.

Ma traballare in unu Ufitziu Limba Sarda, no est unu traballu comente sos ateros: no bastat aere solu sas cumpetentzias (chi cherent agiornadas a manera continua); bi cherent puru istogamu forte e passione, bi cherent atributos!!!

Traballare cun e pro sa limba, no cheret narrere a essere galu apasionados o istudiosos de costumes o ischire ite est “su madrighe”; cheret narrere essere de aere una profesionalidade reconota, no tantu da sa zente, cantu dae sa comunidade iscientifica; cheret narrere de aere fatu e sighire a faghere istudios de chirca linguistica, sotziale e istoricas; cheret narrere cumprendere sa tènnicas de sa comunicatzione e de aere in conca sos printzipios de e pro una “politica linguistica”, chi depet a essere seria, pro no ruere in sos rieddos de sos campaniles, de sos contigheddos de foghile, de su folcklore pro sos turistas.

 

Nadu custu, preferio lassare sa paraula a sos numeros chi contant, sena peruna duda, chi a sa comunidade sindiesa agradat (e puru meda!), faeddare, letzere, iscrivere e cumentare sas noas de su bidda e de su Comune in sardu; custu mancari sas noas bentzant iscritas, a manera printzipale in LSC.

Sa sebera de sa LSC no bocchit niunu, no bocchit sa faeddada sindiesa, ma permitit a sos sindiesos de “faghere a gara” pro s’amentu de paraulas sindiesas chi fiant ruinde in s’òlvidu.

 

Sos numeros narant chi:

· s’ULS de su Comune de Sindia, at tentu sos 11 meses atividade de s’annu 2010, sas bisitas in ufitziu de 276 pessonas (cun galu unu mese de atividade), , contra a sos 244 e sos 246 de sas ateras annualidades;

· sas bisitas a su situ internet in s’annu solare 2010 sunt istadas 16.030, fattas dae 10.510 bisitadores diferentes, cun d’una media de 44 bisitas a die, contra sas 1.931 bisitas de sos 5 meses de s’annu 2007; sas 11.865 de s’annu 2008, sas 11.463 de s’annu 2009, in totale in 3 annos e 5 meses de atividade su situ est istadu bidu 41.289 bortas dae 25.968 pessonas;

· at publicadu in custu annu 49 articulos, pro unu totale de 147 in tres annos;

· sas oras de atividade sunt istadas 318 (a su 31 de nadale, cun galu unu mese de atividade), contra a sas 450 de s’annualidade 2005 e sas 736 de s’annualidade 2004;

· sas dies de traballu sunt istadas 47, contra a sas 73 de s’annualidade 2005 e contra sas 99 de s’annualidade 2004;

· est istadu organizadu su 1° cuncursu de poesia “Su Casu”;

· no est istadu possibile, faghere occannu puru sos cursos de formatzione pro sos amministradores;

 

A sa fine de su mese de ghennàrgiu amus a publicare sa Relata agiornada chi est istada presentada a sos Amministradores, a su Responsabile de su Servitziu Amministrativu e a su Responsabile de su Protzedimentu.

 

Su Responsàbile de s’ULS de su Comune de Sindìa

Su Dut. Mario A. Sanna

Pro unu bilantziu de s’atividade de s’ULS in s’annu 2010.ultima modifica: 2011-01-03T11:29:00+00:00da limbasardsindia
Reposta per primo quest’articolo
Questa voce è stata pubblicata in UFITZIU LIMBA SARDA SINDIA. Contrassegna il permalink.

Lascia un commento