ULS SINDIA - Ufìtziu Limba Sarda de su Comune de Sindìa (NU)

SINDIA: SU CALENDÀRIU DE SAS FESTAS E DE SOS EVENTOS

A pustis de cantu est istadu dimandadu dae carchi emigradu, ponimus in custa pagina una tabella de resumu de sas festas e de sos eventos chi benint organizados in sa bidda de Sindia.

SINDIA: SU CALENDÀRIU DE SAS FESTAS E DE SOS EVENTOS

SAS FESTAS RELIGIOSAS

·        sa die 16 de su mese de bennarzu: su veglione e su fogulone pro sa festa de Sant’Antoni de su Fogu;

·        meses de abrile o maju: tres chidas a pustis de sa Pasca de Abrile, bi sunt sas battor dies de festa in onore de Santu Zorzi, Santu Raffaele e Santu Sidore (cun battor dies de Ardia de sos cadderis);

·        in sas dies de su 23 e de su 24 de su mese de làmpadas: sa Vigilia e sa Festa pro Santu Giuanne, su sero de sa die 23 in sas carrelas benint allutos sos fogulones e tottus sos bighinados apparitzant sas mesas pro chenare in sas carrelas;

·        sas dies de su 27 e de su 28 de su mese de làmpadas: sa Vigilia e sa Festa pro sos Santos Pedru e Paule, cun su veglione e sa chena su sero de sa die de su 27;

·        sas dies de su 7 e de su 8 de su mese de cabidanni: su Veglione e sa Festa pro Santa Maria de Corte: sa die de su 7, in s’abbadia de Santa Maria de Corte o Cabuabbas si che faghet una veglia cun sa chena lumenada “Izzadolzu”, sa die de su 8, sa Festa Manna cun sas Missas Solennes (su manzanu e su sero) e su sero sa Protzessione, pro sa recuida de su simulacru de sa Madonna in Sindia;

·        sas dies de su 16 e de su 17 de su mese de Santugaine: su veglione e sa festa pro Santu Deormitti;

·        sa die 4 de su mese de nadale: sa festa pro Sant’Arbara, cun missa e ustu apparitzadu dae sos emigrados.

ÀTEROS EVENTOS

·        su Carrasecare Sindiesu:“Sa Cursa ‘e sa Pudda”, proa de abilidade de sos cadderis de Sindia;

·        dae s’annu 2006, in sa bidda de Sindia, est organizadu in d’unu fine chida de su mese de maju, sa manifestatzione lumenada “Zimineas cun Cannittas”, chi faghet cabu a s’eventu “Primavera nel Marghine”: in custas tres dies sos bisitadores podent bìdere e connòschere in sas carrelas antigas de sa bidda, sas domos e sas “cortes” antigas, sas artes e sos traballos antigos; podent tastare puru sos prodottos e sos prattos tipicos de sa tradissione sindiesa.

·        in su tempus de su ierru, est apparitzada sa sagra de sa Suppavalza, unu prattu de sa tradissione sindiesa, preparadu cun pane, sartidza e latte;

·        in su tempus de s’istiu, carchi annu est istada organizada sa sagra de s’Arbeghe;

·        in su tempus de s’istiu (meses de triulas o austu), benit organizada sa Festa de S’Emigradu,  cun missa, chena a su cale sighint sos cantos e sos ballos de sa tradissione sarda. 

SINDIA: SU CALENDÀRIU DE SAS FESTAS E DE SOS EVENTOSultima modifica: 2011-05-23T12:43:00+00:00da
Reposta per primo quest’articolo