ULS SINDIA - Ufìtziu Limba Sarda de su Comune de Sindìa (NU)

SINDIA: SOS DEGHES ANNOS DE ATIVIDADE DE SA BIBLIOTECA COMUNALE.

SINDIA: SOS DEGHES ANNOS DE ATIVIDADE DE SA BIBLIOTECA COMUNALE.

 

Sa Biblioteca Comunale de Sindia, lompet sos deghes annos de atividade: mercuris 31 de santugaine 2012, a sas oras 16.00, b’at a èssere una manifestatzione pro festare custu eventu.

 

Sa Biblioteca Comunale est istada fundada a intro de sas iscolas de Sindia, in ue est adurada fintzas a s’annu 2010 cando est istada tramudada in sa sede de oe , in su palatu de su Comune ‘Etzu, in su tzentru istòricu de sa bidda, in sa carrera de sa Caserma.

 

Sa Biblioteca Comunale de Sindia tenet nùmeros de importu mannu: 500 utentes in subra de 1850 abitantes, chi non sunt pagos, 6.800 libros a disponimentu de sos utentes e 3.000 libros prestados in su 2012.

 

Ma non solu, sa biblioteca est multimediale cun sas postatziones pro sa retza de internet, sos dvd de sos films, sos cd de mùsica; sa gestione de sa biblioteca est istada dada cun afidamentu a sa coop. Byblos de Macumere chi mandat comente responsàbile Fina Attene chi tenet s’agiudu mannu de Ines Zedda, custas duas professionalidades sunt semper a disponimentu de sos utentes pro cali si siat problema chi pertocat sa biblioteca.

 

Dae no ismentigare puru chi in custos annos sa Biblioteca Comunale at fatu sos progetos pro su Servìtziu Tzivile Natzionale e chi at dadu sa sede puru pro 3 annos e mesu a s’Ufìtziu de sa Limba Sarda.

 

 

In su matessi palatu de su Comune ‘Etzu, agatant sede puru su Cas- Tzentru de Agregatzione Sotziale pro sos pitzinnos e sos anzianos e s’Iscola Tzivica de Mùsica.

 

Sa Biblioteca de Sindia est aberta a mangianu su martis e sa chenàbura dae sas oras 8.30 a sas oras 13.00 e a borta de die in sas dies de su martis, su mercuris e sa giòbia dae sas oras 16.00 a sas oras 19.00.

 

Su nùmeru de telèfonu est 0785/41570, mentras s’indiritzu de posta eletrònica est biblioteca@comune.sindia.nu.it. Su catàlogu de sa biblioteca podet a èssere bidu in su situ www.tilipirke.it .

SINDIA: SOS DEGHES ANNOS DE ATIVIDADE DE SA BIBLIOTECA COMUNALE.ultima modifica: 2012-10-29T18:02:00+00:00da
Reposta per primo quest’articolo